رحلتا عمرة مجانيتان.. مكافأة "الزهراء" على حفظ القرآن الكريم

"بصونك" إنجازات المراهقين ومشكلاتهم بصوتهم

بقلم: محمد عماد رضوان 

اسمي محمد عماد رضوان عندي ١٥ سنة، عندي ٣ أخوات بنات وعايشين مع والدي ووالدتي، وأنا في أولى ثانوي، وسباح نادي ٦ أكتوبر سابقًا ونادي حدائق الأهرام حاليًا،  بحب السباحة والرسم ولعب البلاي ستيشن، بدأت السباحة من وأنا عمري ٤ سنين بسبب إني كنت بعاني من حساسية الصدر فكل الدكاترة أكدوا إني لازم ألعب رياضة عشان صدري يخف، وللأسف أخدت أدوية فيها كورتيزون خليتني بعاني من زيادة في الوزن، لكن أنا وأسرتي مكناش حابين كده وسعينا للأفضل، لحد ما بدأت تظهر قدراتي في السباحة، وبدأت أحب السباحة لأنها حولتني لإنسان تاني جسمانيًا ورياضيًا وأخلاقيًا وعقليًا.

وبدأت المشوار بحصولي علي أرقام قياسية مسجلة باسمي واسم الأندية اللي لعبت ليها، وعلى كأس أحسن سباح وكأس أحسن رقم في أول بطولة جمهورية ٢٠١٨، ولعبت بطولة الجيزة فبراير ٢٠٢٠ وأخدت كأسين أحسن سباح وأحسن رقم، وكنت هعمل أول عقد ليا مع أكبر الأندية في مصر لكن جت فترة كورونا قعدتنا كلنا في البيت، لكل أول ما رجعنا من الفترة دي بقيت بشتغل الضعف عشان أعوض الفترة دي وأفضل محافظ علي مكانتي في الصدارة، ورجعنا تاني للبطولات ببطولة الجمهورية ٢٠٢١  كنت في ٣ إعدادي ولازم أجيب مجموع، فكنت لازم أروح التمرين كل يوم ٥٠ كيلو رايح جاي  أدرب الفجر في الشتا في عز البرد عشان أقدر اتمرن وأطلع علي المدرسة وأرجع أخد دروسي، وأطلع علي صالة الجيم وأرجع أذاكر وأنام عشان أكرر ده كل يوم، كل ده في ظروف نفسية ضاغطة، ولكن بفضل الله امتحنت وجبت مجموع كبير ودخلت ثانوية عامة.

محمد عماد رضوان بطل السباحة

وجت البطولة في شهر يوليو ٢٠٢١، ولكن قبل البطولة بأسبوع مدربي يعمل حادثة واضطريت أروح البطولة من غيره، ولكن كنت قد المسئولية قدام مدربي، وكنت في السبق متصدر المركز الأول ولكن الضغط النفسي اللي اتعرضتله خلاني احصل علي المركز الثاني بـ ١٣ جزء من الثانية فرق بيني وبين الأول، ولكن لما رجعت من أجازة البطولة اشتغلت علي نفسي سنة كاملة بدون يأس، وجت البطولة وهنا كانت المفاجأة بحصولي علي المركز الأول في جميع السباقات وهم خمس سباقات، وأديني مستمر في رياضة  صعبة في ظروفها وشغلها لكن بحس فيها بالمسئولية، ونفسي في حاجات صعبة لكن مش مستحيلة إني أكون أول سباح يعلق ميدالية أولمبية لمصر في السباحة، وحاجات تانية كتير ربنا يقدرني أحققها، وبنصح كل شاب لازم يلعب رياضة، أي رياضة ، هاتفرق معاه كتير ، وهتغير منه في حياته ومعاملته مع الناس وثقته في نفسه، أما في مجال الحياة العامة فنفسي أكون ظابط عمليات خاصة.